ಬಾರೋ ವೆಂಕಟೇಶ

ಬಾರೋ ವೆಂಕಟೇಶ ಮನೆಗೆ ಬಾರೋ ಶ್ರೀನಿವಾಸ
ತೊಡೆಯಲಿಟ್ಟು ಮುದ್ದು ಕೊಟ್ಟು ಹಾಲು ಸಕ್ಕರೆ
ಸಹಿತವಾಗಿ ಪುಟ್ಟ ಬಟ್ಟಲೊಳಗೆ ನಿನಗೆ
ಹೊಟ್ಟೆ ತುಂಬ ಹಾಲು ಕೊಡುವೆ ।।

ಸಣ್ಣನಾಮ ಹಣೆಯಲ್ಲಿ ಹೊಳೆಯುತಾ
ಶಂಖಚಕ್ರ ಪದ್ಮ ಕಿರೀಟವ ತೋರುತ
ವಾಮಭಾಗದಲ್ಲಿ ಲಕ್ಷ್ಮಿ ದೇವಿಯೊಡನೆ ಸರಸವಾಡುತ
ಅಮ್ಮ ಬಹಳ ಹಸಿವೆಯೆಂದರೆ
ಹೊಟ್ಟೆ ತುಂಬಾ ಹಾಲು ಕೊಡುವೆ ।।

ಚಿನ್ನಿ ಕೋಲು ಚೆಂಡನಾಡುತ ಗೆಳೆಯರೊಡನೆ
ಗೊಲ್ಲನಾಗಿ ಗೋವು ಕಾಯುತ
ಕಾಲು ಪಟ್ಟೆ ಕಾಲಲುಟ್ಟು ತುಳಸಿ ಮಾಲೆ ಕೊರಳ ಧರಿಸಿ
ನಿಮ್ಮ ಪಾದ ಮುಂದಕಿಟ್ಟು
ಎನ್ನ ಮೇಲೆ ಚಿತ್ತವಿಟ್ಟು ।।

ಬಾಲರಿಲ್ಲದ ಬಂಜೆಯೆನುವರೋ ಎನ್ನ ಜನ
ಬಾಲರನ್ನು ಪಡೆದ ಜಾಣರು
ಹಸುಳೆ ಇಲ್ಲದೆ ಬಹಳವಾಗಿ ವ್ಯಸನದಿಂದ ಕಾಲ ಕಳೆದೆ
ಶಿಶುವಾಗಿ ತೋರಿ ಬ೦ದ
ಶೇಷಗಿರಿಯ ಶ್ರೀನಿವಾಸ ।।